《中年好聲音》第一季亞軍得主 李佳 每次出席活動都係精神奕奕、笑面迎人，不時喺社交平台分享行善同家庭樂相片。不過今日（23號），佢就突然公開自己臥病在床情況，原來佳佳老師近日入院接受手術。
佢先多謝大家問候，又話自己一向都係報喜不報憂嘅人，平時唔舒服都唔會講，以免大家擔心，但今次決定同大家分享自己經歷同感受，原因係想警示大家對消化系統不適嘅重視。
原來一個月前，佳佳有兩晚突然胃痛到成晚瞓唔到。求醫時醫生曾診斷為腸胃炎，但就問咗一句一直冇醫生問過佢嘅問題「你有冇照過膽啊？」當時佳佳唔清楚肝膽胃嘅關係，亦從來冇照過，於是第二日就接受檢查。
點知得出結果令佢好驚訝，報告第一句「A normal gallbladder is not identified.」（膽囊萎縮內有多發性膽結石……）。此時，佳佳先知原來多年來消化唔好， 胃脹氣原來真正原因係咁，而醫生話佢嘅膽問題起碼10年。
佳佳希望借自身經歷，提醒大家， 如果胃部長期不適， 位置偏右好大機會同膽囊有關！ 而且原來膽囊問題亦有家族遺傳史，所以就算自己腸胃好，但屋企有人存在膽囊問題都要去定期檢查。
最後，佳佳講述自己現時情況，佢話噚日（22號）由於手術後二氧化碳氣體造成肩膀疼痛難忍，好彩有兩位同學一人一邊不停幫佢按摩，緩解疼痛，全程悉心照顧佢。佢話自己會加油， 越來越好，兼且多謝大家嘅問候。
