邱淑貞老公 沈嘉偉 同細佬 沈健偉 感情要好，兩兄弟一齊打拼時裝品牌江山，而沈健偉亦因生意同哥哥關係，與大批圈中人相熟。近日沈家有喜事，沈健偉榮升為外父，女兒婷婷同男友Justin拉埋天窗，婚宴喺台灣舉行，現場星光熠熠嘅程度唔比同日舉行嘅「金馬獎」頒獎典禮遜色。
赴宴為一對新人送上祝福嘅親友賓客，包括沈嘉偉邱淑貞一家、梁朝偉與劉嘉玲、袁詠儀、張清芳、鍾鎮濤與家人、周汶錡、「Figure教父」Michael Lau 等。現場除咗一對新人以及新老爺奶奶、外父外母成焦點外，嘉玲與偉仔亦係賓客集郵目標，嘉玲亦用相機將難忘時刻拍低留念，而B哥哥嘅囡囡鍾懿更為一對親人上台獻唱，送上衷心祝福。
