近期網上熱話，莫過於係電影版《尋秦記》同某零食聯乘推出嘅電影角色珍藏卡！由於珍藏卡係隨限定版餅乾條隨盒附送，故唔少網民都係網上曬出自己買到嘅餅乾條，於網上同大家一齊關盲盒，亦因此一度令該款餅乾條缺貨。
令無數觀眾期待已久嘅電影版《尋秦記》終於唔再係都市傳說，電影已敲定於2026年元旦上映。由於電視劇版《尋秦記》係無數觀眾嘅回憶，故當電影版嘅聯乘珍藏卡一推出，即引起fans瘋狂搶購。有網民於網上發文，指 宣萱 所飾演嘅烏家大小姐烏廷芳嘅角色卡相當稀有，狂開30多盒都抽唔中一張，亦有網民分享自己連續五抽都係抽中洪天明，不過亦有fans追問點解9+3（9款基本＋3張隱藏版）嘅電影角色珍藏卡入面無林峯份。
近年盲盒同抽卡盛行，除咗電影版《尋秦記》推出聯乘電影角色珍藏卡外，周星馳嘅經典作品《西遊記第壹佰零壹回之月光寶盒》（內地譯為《大話西遊》）亦推出咗30週年紀念收藏卡，由於有機會抽中周星馳、朱茵、羅家英及吳珏瑾嘅親筆卡簽，故亦引嚟唔少fans搶購收藏。
