中島美嘉宣布明年亞巡開台灣站 迷上台式便當日日食同款

日本歌手 中島美嘉 日前現身台灣，宣佈亞洲巡唱下年5月將重返寶島演出。正所謂貴人出門招風雨，Mika亦自認係雨神體質，每次到台灣都會撞正落雨，令佢都覺得好頭痕。至於講到寶島之行有乜難忘體驗，Mika就話迷上咗台式便當，自己亦有去台灣嘅寺廟祈福。

其實Mika呢次到台灣唔只宣佈出年開巡唱好消息，佢仲會喺台北一個Live House開騷。Mika就話，每次開騷前自己都會好緊張，開心同不安都係一半一半，亦擔心會冇人嚟睇，但自己亦會好好準備，令大家樂在其中。