早於參加《中年好聲音3》前已曾為唔少歌手製作歌曲嘅 張與辰 ，繼早前推出《深海》等歌曲後，再一次發揮音樂才華於年底推出全新單曲《Novara》，Vic更身兼作曲、編曲同監製，，連概念都源自佢本身腦海中想法。Vic又邀請 T-Rexx 為新作填詞。
佢又提到指：「歌名《Novara》靈感來自知道會喺除夕舉行跨年演唱會後，就想創作一首主題曲。 搜尋完發現拉丁文中「Nova」呢個字係新星誕生嘅意思，非常切合之前8月演唱會玩嘅概念，所以「Nova」就成為新歌的一部份，而當時我咁啱頂帽有新世代字樣，加埋係「Nova Era」，又覺得好似好難讀，所以簡化佢叫 《Novara》，意思就係新星嘅世代。 」
Vic仲話：「演唱會主題決定叫《The Novara Ball》，作為上一次嘅延續，再加上係一個跨年演出，所以就有一個新嘅世代，新嘅開始，Perfect ！」
《Novara》創作過程中，與辰面臨一定挑戰，尤其編曲方面，而歌詞中充滿力量感，鼓勵聽眾勇敢踏出第一步，為自己嘅生活創造新開始。與辰希望新歌激勵每一位聽眾，不論年齡大小都勇敢追尋自己嘅夢想，克服周圍嘅質疑同挑戰。而與辰更首次以XR技術製作MV，拍攝結合現實同虛擬環境，令佢身處外太空，加上精彩舞蹈同多種不同造型演繹。
