秦沛大仔 姜文杰 2022年低調迎娶鼎爺李家鼎同前妻施明嘅愛女 李泳淇 ，兩 人婚後擁有幸福婚姻生活。姜文杰11月26號喺社交平台以「1 + 1 = 3 🩷」配文，貼出一張同太太鍚鍚、共同拎住一張BB超聲波相嘅照片，開心宣布太太有喜消息！
喜訊一出，妹妹 姜麗文 即刻留言回應：「AUNTIE LESLEY IS READY」，音樂人紀佳松、廖子妤、王晶女兒王海榛、亦留言送祝福。 Lesley同樣喺2022年出嫁成家，2024年與TVB約滿後，就同老公移民到美國生活兼追逐演藝夢，不過當地競爭激烈，要試鏡爭取到一個角色並唔容易。
Lesley日前喺社交平台坦露近況兼訴心聲，更透露自己抑鬱症復發，而且係12年嚟最強烈嘅一次。 Lesley喺文中表示，呢個月對自己而言相當艱難，因為抑鬱症第百萬次復發：「整整12年了。這麼多年後，我仍然需要『保持堅強』打這場仗，即使用治療和抗憂鬱藥，有時也很令人氣餒和失望。這次很不妥，是我自2014、2015年以來覺得最強的一次？太瘋狂了！」
但Lesley同時感恩有丈夫照顧，時常提醒自己永遠唔好為抑鬱情緒道歉，自己亦會用「數字療法」（0代表毫無症狀，10代表世界末日）表達感覺，以及為自己定下每日生活目標。所以即使感到疲憊同辛苦，但近日佢感到快樂、健康同情緒穩定，意味自己又打咗一場相當漂亮嘅仗。 相信今次姜家有喜，一定會令Lesley情緒改善，正面迎接成為姑姐嘅生活。
