衛詩雅（Michelle）、陳凱琳（Grace）日前盛裝出席一個頒獎典禮並擔任頒獎嘉賓。前日（24號）係Michelle生日，佢就話收到收到姪仔嘅「You Still Young」訊息而心花怒放。至於講到老公周祉安有咩表示？Michelle就話，上年老公送咗頂帽但唔啱自己心意，所以今年學精咗，自己買咗啱心意嘅綠松石首飾，再將賬單交俾老公。
Michelle仲話，老公今年好搞笑，一到凌晨十二點就熄燈，叫佢扮唔知、扮驚喜，但個生日蛋糕明明係二人一齊買嘅。對於生日願望，Michelle就希望拍攝順利、身體健康及世界和平，不過自認未有資格做媽媽，想繼續享受二人世界，老公對生育亦持開放態度，兼且雙方家長都冇俾壓力，即使係領養亦可以接受。
靚媽Grace早前趁有三日假期，就帶住六歲大仔飛往三亞旅行，留低老公鄭嘉穎留港照顧兩個細仔。Grace就話說：「開學前爸爸帶咗大仔去新加坡玩，今次就輪到我，大仔鍾意食，好easy going，好聽話唔難湊。」而喺三亞最後一夜，兩母子更喺酒店談心。被問到有冇被二仔、孻仔投訴「大細超」時，Grace自言相當公平，已經同兩個仔約定出年由爸爸帶佢地一起旅行，Grace亦大讚老公事事親力親為，感恩身邊有個咁錫小朋友嘅爸爸。 至於未來同老公有冇機會夫妻檔合作？Grace就話：：「佢唔得，做戲對佢嚟講最有滿足感，所以我唔會逼佢做唔鍾意嘅嘢，佢亦好支持我嘅工作。」
