由麥兆輝執導嘅新戲呢日舉行首映，一眾演員 郭富城 吳鎮宇 方中信 姜大衞 周勵淇 及 湯怡 均有出席。
雖然主演之一嘅 任達華 未有到場，不過佢就成為咗話題人物，城城同鎮宇仲攞華哥日前喺活動上跌親嘅事嚟講笑，城城大讚華哥彈力好好，而鎮宇就分享華哥身手了得嘅原因，指對方踢足球時係擔任守門員嘅位置，所以平時撲完個波，滾兩圈後就會起返身，鎮宇又戲言估計對方係專登跌親露兩手，指當時琦琦仲專登後退兩步騰出空間畀華哥呀。
鎮宇指華哥呢一跌，媒體可以報導幾日，而佢哋呢啲出嚟宣傳電影嘅就冇咩特別，有記者指現場都有藍地氈，鎮宇即講笑話自己要表演碌樓梯。
城城同鎮宇相隔25年再合作，佢由黃金單身漢升呢成三女之父，城城呢日就同大家分享自己心態上嘅轉變，仲話無論喺出面做嘢有幾辛苦都好，當返到屋企見到BB，個人就會融化晒，覺得一切都係值得。
鎮宇早前被目擊用樂悠咭搭巴士而引起討論，大家驚訝佢竟然已經 63歲，鎮宇就講返當日係陪媽媽搭巴士，一齊拎張樂悠咭出嚟嘟一嘟。身旁嘅城城就話自己今年已經奔六可以攞樂悠咭，但係佢就未攞，佢仲問鎮宇張樂悠咭好唔好用。
