大埔宏福苑五級大火，全港市民都徹夜難眠，心繫仍然受困以及失去家園嘅居民，唔少市民都自發出心出力提供協助。而娛樂圈藝人亦發揮佢哋嘅社交平台網絡影響力，提供有用資訊。
張敬軒 集合「宏福苑大火社區支援資訊」，不斷更新至凌晨，亦更換頭像，轉換成一張雙手合十祈禱相片。 張繼聰 就轉載警方提供予傷者查詢資料嘅熱線。蔡卓妍同李逸朗等亦轉載社區協助資訊，期待為需要人士提供協助。 
蕭唯展同太太江若琳，亦宣布旗下飲食集團嘅大埔分店通宵開門，為受影響人士免費提供食品飲品。傅明憲顧及火災中受影響嘅毛孩，表示若果有任何動物需要協助，可以聯絡愛協24小時動物拯救熱線。另外亦提供火災中獲救嘅貓貓資料，期待主人早日與貓貓重聚。
