譚耀文即將喺12月初開騷，呢日佢同三位《聲秀》學員蕭凱恩、胡港豐、布子殷為個唱進行綵排。呢次係阿譚入行37年首個個唱，所以佢都特別重視，距離開騷時間越近，心情亦越緊張，因為歌單有舊歌有新歌，佢擔心自己會唔記得歌詞。
個唱喺香港銷情熱烈，已經全場爆滿，阿譚都好想開多場，但因為場地問題，所以都要喺之後再計劃。
阿譚喺圈中人緣極好，演唱會除咗有三位學員做嘉賓，佢預告仲會有一位神秘嘉賓。至於呢位嘉賓係邊個？阿譚就大賣關子，只係話二人有淵源，對方亦係天后級身分。
《聲秀》學員喺12月中開嘅畢業演唱會場地，同阿譚呢次開騷嘅場地係同一個場，三位學員都覺得做譚Sir嘉賓可以預先踩埋台！為咗呢次做嘉賓，三位都全力以赴準備演出，希望到時可以呈現出一個完美表現畀觀眾。
