造成至少128人死亡嘅宏福苑五級火，事件震驚全球。 謝嘉怡 喺事發當日（26日）上載現場片段，以中英文留言「我向所有罹難者、傷者以及今天失去家園的人們，致以最深切的慰問和祈禱。今天我眼睜睜地看着奶奶（嫲嫲）的房子在熊熊烈火中燃燒，真是令人痛心的一天。」不少網民都擔心嘉怡嘅家人安危。
事隔一日，嘉怡再度發文，並為自己未有及時向大家報平安而致歉。嘉怡表示家人平安無事，並指火災發生時，幸好家中沒有人，佢同時再向所有受影響嘅人致以最深切嘅安慰、哀悼及祈禱。
曾為《飯戲攻心》、《逆流大叔》、《殭屍》等電影擔任美術指導嘅 張蚊 ，其外公亦係今次火災中嘅災民，張蚊自言對宏福苑有着濃厚感情，見到火災現場，佢即時係聯想到屋苑住咗好多老人家，期望火災帶來嘅破壞力減至最低，亦希望消防員可以救得一個得一個。
佢亦上載一張以前由外公居住樓層所拍攝嘅舊照，並於帖文中表示：「宏福苑，呢個由細到大去嘅地方，喺新聞睇住我公公間屋被火吞噬，好傷痛。慶幸家人全部安全離開，佢哋出到嚟衫都冇多件，乜嘢都冇晒，大家幫得就幫，睇吓其他災民有咩需要，互相關心大家心理狀態，係我哋而家可以做嘅嘢。」
