呂良偉與太太楊小娟呢日出席一個慈善活動，夫唱婦隨之餘，二人嘅服裝仲襯到絕，原來呂哥平時咁有型，都係多得呂太呢位私人造型師，呂哥話一切都係聽從對方嘅指揮，而呂太就讚老公好有品味，二人喺呢方面默契十足。
譚俊彥呢日會喺慈善晚宴大展廚藝，炮製一道黃金海鮮泡飯，除此之外佢仲會開口獻唱。講開唱歌，阿Shaun之前喺《萬千星輝賀台慶》獻唱時疑似失準，對此佢坦然面對批評：「多謝大家俾我嘅意見，每一個舞台都係一個經歷、一個成長，我哋會檢討自己做得唔好，下一次有機會會盡力做好。」
呢日慈善騷嘅搞手張玉珊忙到滿場飛，熱衷慈善事業嘅佢，計劃繼續擴大自己嘅慈善事業版圖，佢話想做慈善嘅Management，令善款可以得到更有效嘅運用。
三位應屆港姐陳詠詩、李尹嫣同袁文靜都有出席活動，為慈善出一分力，袁文靜近日喺社交平台宣布自己重返校園教書，佢表示：「因為藝人嘅工作好唔穩定，所以想keep住自己有一個返工嘅規律性。」至於李尹嫣日前就上載咗自己同大王安德尊10年前嘅合照，相隔10年再影返合照，佢就大讚大王保養得宜，完全冇變過。
