為期12日嘅新加坡國際電影節11月26號開幕，舒淇導演處女作《女孩》成為今年影展開幕片，而影帝梁朝偉亦帶住佢主演嘅首部歐洲電影《Silent Friend》赴會。
偉仔出席名為「In Conversation With Tony Leung」嘅座談會，佢透露自己下年工作忙碌，除咗電影仲會拍電視劇，而且佢會喺電視劇當中飾演一個連環殺手。之前有傳佢搬去日本定居，偉仔就澄清自己並非定居，只不過好享受喺語言不通嘅環境生活，而且喺日本冇人搵佢傾偈，感覺好舒服。
舒淇首部執導嘅電影《女孩》，以自己嘅童年作為藍本，作品得到各大影展嘅肯定，舒淇仲喺釜山影展勇奪最佳導演獎，今次舒淇帶兩位主演9m88同白小櫻參加SGIFF，映前佢特別同觀眾分享心路歷程：「花了十年時間走到現在，新加坡國際影展應該是我最後一站，真的很感謝這些優秀的演員陪我一起走到這裡。」佢坦言導演工作比想像中更有挑戰，「至於會不會再導第二部，就看新加坡觀眾喜不喜歡了。」幽默回應令全場觀眾拍爛手掌。
