梁思浩 日前飛往印尼雅加達，出席《第30屆亞洲電視大獎》頒獎禮，雖然因工作暫時離港，但他仍心繫大埔大火災民，祈望逝者安息，傷者早日康復，受災居民安好。
思浩早前為大馬電視台主持嘅《超能力學院》，獲《第30屆亞洲電視大獎》提名「最佳綜藝節目」獎，8個來自亞洲各個地區嘅節目一齊競逐。思浩作為香港代表不負眾望，獲得大獎殊榮，同時亦係頒獎禮上惟一得獎港人。
思浩以素色服裝與團隊上台領獎，佢以廣東話說︰「今晚我想以廣東話多謝大家，多謝《超能力學院》嘅台前幕後，我仲想幫大埔災民打氣，大家加油。」提阿得獎感受時佢話︰「今晚大會十多個國家，開場時為香港默哀，我上台攞獎時，亦用廣東話同大埔災民打氣，全場掌聲令我好感動。」
佢原定回港後會同台前幕後慶功，不過因大埔宏福苑火災，大家亦心情欠奉而決定取消，思浩指︰「我哋會將今次六圍慶功酒席費用，全數捐俾大埔災民，表達心意。」
頒獎禮現場思浩又遇到相識多年嘅陳子聰︰「喺後台見到子聰，佢狀態非常好，我哋認識廿多年，佢靚仔返晒，狀態好好，佢今晚係頒獎嘉賓，頒最佳男配角同埋最佳女配角，好開心見到佢。」
近年重返TVB先後推出靈異節目《通靈之王》、《通靈之王2》及《直播靈接觸》嘅思浩，深受觀眾歡迎，今年中拉隊到大馬公開招募賦有超能力嘅學員拍攝新節目，由三位來自唔同門派嘅師傅，揀選有潛能學員引導提升潛在超能力。