謝霆鋒 29號於澳門出席「2025美獅鋒味搖滾美食節」，當晚佢穿上以黑色為主色嘅外套演出，期間並對 大埔宏福苑 嘅居民送上慰問。
霆鋒喺台上先後以廣東話及普通話表示：「呢幾日大家都知道，香港好不幸，遭遇到一場好令人心痛嘅大火，美高梅集團以及鋒味品牌，我哋都捐咗少少錢去災區，同埋畀大需要嘅人士，我哋好清楚，錢係彌補唔到寶貴嘅生命，但係我亦都相信，我哋只可以緊守自己嘅崗位，先至可以送出我哋嘅支持同溫暖，我亦都再一次多謝今日嚟到支持我哋、嚟關心香港嘅朋友，多謝你哋。」 講完即90度鞠躬致意。
美高梅集團以及鋒味品牌喺28號發出公告，表示對宏福苑五級大火，造成重大人員傷亡，深感震驚與悲痛，並決定聯合以「美獅鋒味搖滾美食節」名義捐出港幣500萬元，用於向受災居民提供緊急援助，並支援社區重建工作。至於喺29及30日舉行嘅「美獅鋒味搖滾美食節2025」，則會以「跨海送暖」作起點，與所有觀眾一同將關懷轉化為祝福，願逝者安息，生者堅強。