湯君耀Chris 以2025年樂壇新人身份，推出首支個人歌曲， 呢日佢作客《StarTalk》同主持 許文軒 分享，點解會由Model、演員，變成樂壇新人。
Chris表示自細就對音樂好有興趣，不過就未有接受正統學習，只係自己買好多器材返屋企學習同錄歌。Chris指曾經有夢想過做歌手，剛好而家嘅經理人亦係喺唱片公司出身，機緣巧合下就出咗呢首歌曲。
鍾意抒情曲風嘅Chris，平時鍾意聽陳奕迅、周杰倫、李榮浩嘅歌曲，不過講到正式令佢學唱歌，係同孖生哥哥湯君慈喺《流行經典50年》獻唱後嘅事，佢話自呢次演出後就覺得需要認真搵老師練習，所以佢就去咗搵老師學唱歌。
以往嘅工作大多都係同哥哥一齊，今次唱歌就要「單飛」，Chris就指始終大家都係獨立個體，而家嘅工作多數都係分開行事。縱然自小熱愛音樂，但Chris喺大學時竟然係修讀電影，佢解釋其大學嘅電影課程相當出名，加上受爸爸湯鎮業嘅影響，自己都對演戲有興趣。
雖然自細生活喺爸爸嘅光環下，被指係星二代，但Chris話由細到大爸爸都冇畀任何壓力佢哋，所以從來唔覺「星二代」嘅標籤係一個壓力，反而覺得係一種優勢，因為佢嘅起步點比其他人高。
提到爸爸畀佢嘅意見，Chris就指對方相當支持自己，又喺待人接物方面教識佢一定要夠真誠、有禮貌同保持謙卑嘅心。至於講到會否同爸爸有更多合作演出？Chris表示都有同爸爸講過，叫對方登台時帶埋自己。
講到新歌，Chris分享首日同製作團隊見面嘅場景，當時大家相約喺K房見面，原因係要聽下Chris把聲啱唱啲咩歌。試完咪後，對方讚Chris嘅模仿能力好高，而亦係呢次見面後，對方就幫到搵咗好多Demo，其中一首就係《Friendship Only》。Chris仲同大家分享自己第一次入錄音室，聽到自己把聲嘅情景。