徐子珊2019年宣布退出娛樂圈，毅然放棄15年演藝事業，移居英國後於曼徹斯特大學修讀臨床心理學博士課程，同時發展珠寶設計生意，近日有網民上載徐子珊設計新作品，稱收到子珊親筆手寫卡。
子珊貴為珠寶網店老闆娘，手握過百萬生意，親自設計咗幾十款珠寶首飾，價錢由1萬至幾十萬左右，主要喺網上出售，曾推出「Rabbit-duck Illusion」（兔鴨錯覺）系列，佢受訪時講過呢個設計係佢上堂交嘅其中一個功課，而佢近排再次為慈善推出《兔鴨錯覺2》系列，就係925銀配水晶或礦石嘅頸鍊，每條售價近2千港元，子珊得知多年忠粉幫襯，更親手喺19張卡寫唔同嘅鼓勵字句作為小禮物，當粉絲們收到親撰手寫信，感到既驚喜又暖心。
子珊於2015年修讀專業設計及彩色寶石專業課程，投資百萬創立自家設計珠寶品牌，以半工讀形式修讀港大心理學碩士課程，直至2019年完成課程，年底宣布息影，子珊曾透露受一位做玉石生意嘅Uncle鼓勵，叫佢設計一啲珠寶首飾唔使同人撞款，從而令子珊投身珠寶行業。
