今年係香港明星足球成立40周年，去年鬧出叻哥陳百祥將明星足球隊分家事件，一度傳出譚校長與叻哥不和，叻哥近排帶領「精裝明星足球隊」北上打友誼賽，叻哥一向熱愛足球活動，但係最近內地社交平台瘋傳叻哥疑起腳一踩，右腳不偏不倚踩中對方球員下體要害嘅影片，惹嚟內地網民批評其「球風粗野」。
片中見叻哥身穿10號球衣上陣，面臨對手欲上前搶球，叻哥起腳踢中對手下體，該名白衫球員表情痛苦，即時雙手掩下體，一度差點跪喺地上，叻哥一見對手痛至彎腰，隨即上前輕拍對方表達歉意，對手禮貌揮手示意冇事。
影片隨即被網民瘋傳而成為網上討論話題，即使叻哥表達歉意，仍有唔少網民覺得叻哥係故意起腳，更指叻哥早前率領香港明星足球隊前往汕頭參與比賽，對戰廣東萬力名人足球隊時，阿叻就疑不滿球證判決怒踢對手。
