大埔宏福苑早前發生五級大火讓全城哀慟，連日唔少災民發文稱愛寵尚待救援，消防員亦積極救出火場內嘅動物，愛護動物協會喺大火翌日即於廣福邨設認領區供主人認領愛寵，近日一名宏建閣災民貼出灰色貴婦狗Jason嘅照片，感謝消防員救出愛寵，同時亦感激郭秀雲幫手照顧被救出嘅Jason。
該網民稱大火當刻愛寵Jason正獨自在家，翌日得知Jason獲救，身體狀況大致良好，佢首先感謝消防員用生命去救佢嘅寶寶，同時感謝郭秀雲幫手照顧幫手照顧Jason，分享咗一張郭秀雲攬實Jason嘅照片。
該網民於11月27號早上發文，稱與Jason重逢嘅第一眼就係見郭秀雲坐喺地下攬實Jason，郭秀雲當時話見Jason救出嚟後喺個籠入面係咁震，好驚又凍，所以郭秀雲攬實Jason。郭秀雲素來以愛護動物聞名，其父親係海洋公園創辦人之一，自細對大自然及動物有濃厚興趣，目前係「愛護動物協會青少年動物拯救隊」成員，網民讚郭秀雲人美心善，亦感謝郭秀雲喺大埔支援一眾受影響小動物。
