大埔宏福苑五級致命大火，各界齊心支援受災居民度過難關，因應社會目前狀況，11月29號晚舉行嘅《歡樂滿東華》，亦緊急改名為《善心滿東華》，逾百藝人合力演出籌款，最終籌得港幣1億1千8百萬元善款。TVB節目內容營運總經理曾志偉，向東華主席及一眾董事鞠躬致謝，感激大家齊心協力，發揮守望互助嘅精神。
善心滿東華
捐款熱線「1878333」繼續接收捐款至12月13日
其他捐款方法： http://bit.ly/4itE1OH
節目開始前，全體肅立默哀一分鐘，以悼念事故死難者，之後由搖滾之父 夏韶聲 連同 單立文 、 袁偉豪 、鄭俊弘、羅毓儀、戴祖儀 等人一齊夾band，以一曲《永不放棄》為災民打氣。
作為大埔居民嘅肥媽，則率領一眾藝人歌手一齊合唱《真的英雄》，向一眾前線救人嘅英雄，以及喺呢次火災出心出力嘅市民致敬。而《聲夢傳奇》、《中年好聲音》以及《聲秀》嘅一眾唱將：黃博、羅啟豪、冼靖峰、陳芷盈、黃洛妍、劉洋、古淖文、李金凱、馮熙燮、柯雨霏、胡子貝、黃劍文、趙浚承、何晉樂等，亦透過歌聲向災民傳遞關懷愛。
唔少久未喺幕前演唱嘅歌手，好似黃凱芹、張德蘭、何婉盈、李樂詩、文佩玲等，呢晚亦一呼百應嚟到支持。人氣CP 曾展望 同 Sophie葉蒨文 呢晚情侶檔合唱，罕有大開金口嘅兩位，為咗呢次演出都有落力練歌。
大火無情，但人間有愛，一班年輕歌手好似XiX、Honey Punch、IdG Bubbles、MFM等亦希望以自己嘅歌聲，匯聚力量，療癒人心。一方有難八方支援，嚟自馬來西亞嘅歌手蔡明仁、劉俊毅仲有李俊頡亦特登飛嚟香港為災民打氣。
向來善心滿瀉嘅鄺美雲，為幫助 大埔宏福苑 嘅災民度過難關，呢日佢就代表朋友兩間公司各捐10萬港元，佢個人亦捐出20萬港元。而作為港區全國人大代表，香港珠海社團總會會長嘅Cally透露，香港珠海社團總會慈善基金，亦捐出300萬港元比《大埔宏福苑援助基金》，並為傷者及所有受影響嘅家庭誠心祈福。
