台灣歌手 王心凌 28號晚於美國東岸The Theater at Madison Square Garden（The Theater at MSG）舉行巡迴演唱會，佢係首位於該場館開騷嘅華人女歌手。
王心凌喺台上演唱完opening一段後，即向台下觀眾表示希望可以全場為大埔宏福苑大火嘅災民默禱：「在唱下一首歌之前，我想請大家和我一起做一件事。這兩天香港大埔的火災，真的很讓人震驚，也非常讓人心疼。現在是他們最艱難的時刻，讓我們一起為受難者和他們的家人靜默片刻。願這份安靜，能溫柔地陪伴他們穿過這段黑暗。」語畢全場一同安靜默禱，願逝者安息，生者堅強平安。
演唱會上，心凌表示自己對上一次到紐約，已經係20年前嘅事，佢指當年自己嘅工作量相當大，喺兩年內出咗五張專輯、拍咗三部戲，當佢拍完《微笑 Pasta》後，覺得成個人就好似被掏空咗，失去感受身邊人與事物嘅能力，所以心凌就同公司請咗三個禮拜假，飛到紐約療癒被掏空嘅自己，佢形容嗰段獨自喺紐約嘅時間，令佢重新搵返自在呼吸嘅感覺。而家相隔20年再重遊舊地，再喺呢度舉行巡唱，令心凌覺得佢喺紐約嘅故事有咗全新嘅一頁。
紐約場嘅巡唱，最受矚目嘅係MSG場地限定版「點歌 Part」，呢部分完全交畀現場觀眾決定歌單，每當王心凌問到觀眾想聽咩歌，全場嘅呼喊聲就會從四面八方湧起，宛如MSG 版嘅「點歌嘉年華」。心凌亦多次被紐約歌迷逗笑，唔只現場「抽歌單」、仲走到台前親自確認點歌方向，而呢段自由度極高嘅互動，就成為全場嘅歡樂回憶。
