陳柏宇推出今年第七度派台歌 演繹淡然曲風有難度

陳柏宇今年好勤力出歌，日前佢又推出新歌《一天》，呢首歌更係佢今年第七首派台作品，新歌講述人與人之間嘅長久關係，經歷熱戀激情後，回歸細水長流嘅感情，可以話係唔少人愛情故事嘅寫照，Jason深感認同亦認為同自身現時嘅狀態相似。

Jason笑指填詞人James 仲後生，喺歌詞入面雖然最終係想表達嗰份平淡是福，但入面仲係有少少掙扎，歌曲MV講述一位視障人士同導盲犬之間慢慢建立信任嘅故事，帶出愛情之中人與人互信嘅關係，呢首歌係一首情歌，旋律比人一種淡然嘅感覺，但係Jason話喺演繹呢種曲風有啲難度，「我覺得係難嘅！因為現階段嘅我係一個力量型歌手，所以要表達輕啲、淡然嘅嘢係有難度」。