「第17屆日本TAMA電影獎」頒獎禮日前舉行，吉澤亮憑電影《國寶》同80歲嘅長塚京三齊齊獲封影帝，喺電影中飾演歌舞伎演員嘅吉澤亮，呢次憑出色嘅演技，再次冧莊影帝寶座，佢當然喜出望外，仲勾起七年前佢喺同一個頒獎禮上攞獎嘅回憶添！
原來七年前吉澤亮曾經攞過男新人獎，嗰個係佢第一個獲得嘅電影獎項，所以感受特別深，令佢對TAMA頒獎禮有一份特別感情，而呢次可以獲得最佳男主角獎，佢都覺得非常開心，回想喺《國寶》呢部電影中，可以同尊敬嘅導演同演員們，一齊度過三個月拍攝日子，雖然過程好辛苦，但而家終於可以見到美麗嘅景色，真係好有滿足感。
而同樣憑《國寶》呢部電影，攞到最佳女主角嘅瀧內公美，就同廣瀨鈴平分影后獎項，今年產量相當多嘅廣瀨鈴，都話好希望可以再接而厲拍更多好嘅作品，佢話今年自己真係拍咗好多唔同嘅作品比觀眾，比起現代背景嘅，更多係有歷史背景嘅電影，好似大正時代、戰後時代，亦有現代，各個時代都好有深度，所以佢覺得呢一年真係好充實，佢表示會繼續努力，希望再次踏上呢個舞台。