大埔宏福苑火災令全港市民都承受不同傷痛，大家都出心出力希望助災民解決所需。唔少藝人都紛紛捐出善款，鄭秀文日前分享一段到教堂祈禱嘅文章，卻換來被網民質疑。
Sammi面對被質疑聲音，罕有喺社交平台發長文，佢先表示這段文字並非要挑起對罵，只係道出內心感受同說清事實，係平心氣和嘅表達。佢認為「捐獻：最重點在於能夠幫助到人。捐獻這行為本身，於我而言，捐獻完就作結，並不會糾結著眼於捐獻有否被知曉被報導，那並不是我關注的焦點。捐獻後的下一分鐘，就只著眼於『我們所有捐獻者的款項，最終是否能妥善的被使用和分配到有需要的人』」。
Sammi表示非常尊重大家有質疑嘅權利，但亦容許佢說清感受同事實：「當災情發生後，焦慮痛心，跟大家一樣，最直接想到的，就是開始查找合適機構捐獻，希望先藉金錢上幫點忙。而這幾天嘅質疑聲浪，著眼點都是『除了祈禱，你（到底）有沒有捐錢』？」
面對質疑謾罵，Sammi選擇講出自己喺28號當日，已透過助手處理捐獻港幣一百萬，佢又指自己更深嘅想法，係除咗捐獻之外，仲可以為喺水深火熱嘅災民做啲咩。Sammi又指自己PO出祈禱分享後，開始收到陌生DM詢問會否捐款：「我明白也尊重質疑者的質疑。因為疑惑者和質疑者皆不知道事實。但我害怕再收到這些，是種無形壓力，唯有說清事實。重申，我無意引起對罵或任何激辯。（我外表剛強硬淨但其實非常害怕任何對罵衝突）我只是深深覺得對於捐獻或如何實踐愛和關懷，每個人有不同的處理和看法。」
再者，Sammi認為喺災難當前，每個人都會很難受，亦設法用自己嘅方法，希望幫得上忙貢獻自己，捐獻嘅人帶住善念，趕去現埸嘅充滿無私，但每個人處境唔同，未必每個人都能用捐獻或去到現埸來表達呢份關切，但大家時刻都心心念念住災民或關注着災情，形成一個有愛有力量嘅vibe。
Sammi指金錢的確好重要，但並非唯一關愛方式，有時唔好睇小一個網上問候、一個溫暖有愛嘅小圖片、充滿關懷嘅赤字片語，一啲熱心腸嘅勉勵，有時比金錢更可以撫慰到破碎流離嘅心。
最後，Sammi覺得有人選擇分享捐獻係好事，因為佢覺得可以彼此激發愛心，亦讓受助者感受到各界嘅關切，雖然有時被報導出嚟嘅善心捐獻者都係被動嘅。至於因為呢次捐獻嘅「花生」事件，而令Sammi寫呢篇文字，佢覺得相當抱歉，但佢覺得講清楚，心先可以坦然面對世界，不再被誤解，才能直視面對人。
