楊千嬅一連六場嘅紅館演唱會尾場於12月4號晚上圓滿結束，一向寵粉嘅千嬅全晚破紀錄唱足42首歌，更獲不少圈中人一雙一對捧場，AGA（江海迦）與未婚夫「的士邦」鄭子邦、吳若希與老公何兆鴻（Alex）、方力申與懷孕妻葉萱（Maple），以及何超雲首次大方攜新歡Jony現身。
小方與太太葉萱早前恩愛拖手欣賞陳慧琳演唱會，噚日二人結伴睇千嬅個唱尾場，葉萱預產期今個月，即將迎來愛女Isla。噚日小方喺社交平台分享跟太太去做產檢時影嘅胎兒超聲波影片，醫生仲話「佢就快想出嚟」，而當晚佢哋一齊睇演唱會。
而賭王三房千金超雲今年8月跟消防員未婚夫Douglas傳出分手消息，超雲噚晚大方帶新歡去睇演唱會，呢位新歡正正就係之前陪超雲出席朋友生日聚會嘅「鬍鬚男」Jony，二人7月同遊泰國、8月葡萄牙同法國之旅、10月嘅京都之行，今次仲攜新歡高調現身，可見二人戀情非常穩定。
超雲於2022年與任職高級消防隊長嘅Douglas相戀訂婚，曾攜伴出席家族活動，超雲今年8月忽然被發現清空社交平台所有合照，感情生活亦迎嚟新篇章，超雲跟來自台灣嘅型男Jony疑已拍拖大半年，超雲新歡創辦豪華房地產銷售品牌，專注銷售台灣、日本及香港嘅頂級豪宅。
此外，千嬅與老公丁子高結婚15年，育有13歲兒子丁進諾（Torres），近年將工作重心轉去內地市場，3年前曾舉家移居上海，並安排兒子Torres入讀當地名校上海耀中國際學校，有指千嬅為免Torres學習壓力大，選擇為阿仔報讀國際學校，而阿仔知道媽媽開騷，亦返港捧場，認真錫媽媽！
