林夏薇丈夫莫贊生今年4月因未向兩間貸款公司償款約1.35億港元而遭高等法院頒令破產，破產受託人以書面形式申請破產不開始令，破產管理署表示不反對，莫贊生亦無律師代表到庭應訊，事件未有影響視后薇薇嘅心情，薇薇連日忙於為內地劇集《大生意人》宣傳。
薇薇今次與識於微時、同樣畢業於中央戲劇學院嘅陳曉合作，二人相隔十幾年首度合作拍內地劇集，該劇近日開播氣勢如虹，打破央視史上最快收視破3嘅紀錄，其中薇薇飾演「慈禧太后」更獲觀眾激讚演技大爆發，演出年輕慈禧嗰種壓逼感，贏盡收視口碑，對此薇薇覺得既開心又感恩。
該劇播出短短10日已累計逾2.5億網上播放次數，收視高逹3.21%，有望打破肖戰《藏海傳》3.3%之紀錄，成為年度古裝陸劇王，而劇中飾演慈禧之薇薇與「林夏薇與陳曉是大學同學」分別衝上熱搜，雖然薇薇今次屬客串形式參與演出，但薇薇十分緊張，為咗演活年輕慈禧一角花盡心思與努力。
薇薇事前做足功課，做咗好多資料搜集，睇咗好多關於慈禧嘅書去了解人物，知道慈禧愛美與好喜歡戲曲，從體態及語調去做調整，為咗投入角色，薇薇開拍前特別喺屋企著清代花盆底鞋練習，用咗差唔多一個月時間去適應，甚至著花盆底鞋去放狗，連鄰居都覺得好奇怪。
林夏薇呢種「演員自我修養」更獲好友陳曉大讚專業，薇薇呢次用普通話原音講台詞，拍攝前一個月去搵返中央氣劇學院嘅老師練聲音台詞，雖然今次只係幾場戲，但對白要原音去呈現，所以不停反覆練習去調教，希望畀大家見到一個好唔同嘅林夏薇，幸好喺片場見到好友陳曉，令佢放下心頭大石，薇薇更與陳曉互相發出要約，期待再合作嘗試不同角色，擦出新火花。
