一向樂觀開朗嘅薛家燕早前接受網上訪談節目訪問，除咗澄清家燕被傳俾男友呃二億一事外，又首度公開藝人成功之道，家燕姐回想童星生活，當初爸爸反對佢入行，因阿爺用術數「鐵算盤」幫家燕姐睇係揚名四海，從而鼓勵孫女入行，佢最記得難忘係兒時因換緊門牙，向波哥梁醒波自我介紹時，個名變咗「雪茄燕」，意外獲伯樂波哥提攜拍《七兒八女九狀元》。
家燕姐笑住爆料稱有次任姐任劍輝為咗趕去「開枱」，竟然出「絕招」利誘畀200蚊大利是，叫集中精神拍戲，當時8歲嘅家燕姐聽到有咁多錢，皆因當時汽水係賣2毫子一支、拍戲係10蚊日薪，家燕姐立即講晒對白兼唔眨眼，完全冇NG。而家燕姐笑指只有馮寶寶（Bo Bo）係記晒自己對白，仲會提埋任姐講對白，家燕姐大讚Bo Bo係天才童星。
家燕姐講到「七公主」眾人喺演藝圈好努力，成功並唔係僥倖，佢哋當中只有佢同王愛明讀中學，其他人都係靠自修讀書，蕭芳芳同Bo Bo更係好學不倦，除咗兼顧拍攝，日後仲去外國留學。講到「七公主」結拜，家燕姐指馮峰好有商業頭腦，當時想拍一套電影去星馬巡迴演出，順便畀馮寶寶登台，就結拜七公主成為聲勢，而佢哋識於微時，彼此好珍惜呢段六十載姊妹情，不時相聚。
家燕姐笑稱三家姐陳寶珠性格有啲似任姐，唔太多意見，比較隨和、平易近人啲；四家姐蕭芳芳平時鍾意睇書，喺生活上有唔同意見畀到大家，家燕姐就自嘲係「鬼渣五」，主要係氣氛擔當，講吓八卦同搞笑嘢，至於Bo Bo就係最細、一眾家姐最錫嗰個，家燕姐話寶寶好鍾意讀書，識嘅嘢好多。
家燕姐回想拍《真情》、《皆大歡喜》、《十月初五的月光》等，令佢事業豐收，家燕姐覺得做呢行運氣好緊要，要時刻準備好自己，努力把握機會。談及家燕姐當年由玉女角色一改戲路，喺1969年拍賣座電影《飛女正傳》演未婚媽媽「飛女」角色，家燕姐好感謝另一伯樂、大導演龍剛用心教導眾人演出。
家燕姐多年來雖然喺娛樂圈呢個大染缸成長，但係佢一直堅持行正路，唔會做一啲損人利己嘅事，只係靠自己努力，又勸勉新一代藝人唔好走歪路，家燕姐又公開能夠跟三個仔女保持親密關係秘訣，以及罕談點樣成功維繫好婆熄關係，背後原來係受當年奶奶嘅反面教材所啟發，佢努力做好奶奶，維繫婆媳關係。
