楊千嬅完成一連六場紅館演唱會，嚟到尾場佢決定要破自己嘅紅館紀錄，全晚唱咗42首歌，Encore環節都足足有十七首歌，滿足晒觀眾嘅願望，同時千嬅亦感激歌迷一直陪伴，因為呢條回家路絕對唔易。
今個演唱會舉行前夕，遇上大埔五級火災，成個團隊喺短時間內立即作出調整，千嬅承認事件有影響自己心情，而團隊中亦有成員係災民，幸好事發時外出工作，但家園已經被毁，千嬅都話唔知可以講乜，能夠做嘅只有陪伴左右，同埋喺對方需要時伸出援手。
尾場演出前來捧場嘅嘉賓星光𦒉𦒉，包括林建岳、草蜢、周柏豪、方力申同太太葉萱、AGA同未婚夫鄭子邦、何超雲同新歡，而千嬅嘅老公同仔仔，以及父母都有現身。能夠喺入行30周年踏上紅館舞台，千嬅覺得係值得紀念嘅時刻，事前佢冇預紅館會批出檔期，撞啱早前自己身體不適計劃會休息，好彩康復進度良好，於是落實開騷。
演唱會第三場發生機器故障，令特技員被困喺舞台頂，千嬅表示當刻研究過，特技員喺台頂較安全，因為全身帶上安全帶，但明白匿喺台頂係辛苦，所以當對方安全返回台面時，立即叫對方去檢查，而對方亦表示冇事。主辦就封上利是，叮囑對方詳細檢查，特技員翌日返到紅館，表示完全冇事，更將利是捐助災民。
