由胡杏兒、胡定欣、胡蓓蔚、黃智雯、李施嬅及姚子羚組成的「胡說八道會」，姊妹情深厚，李施嬅與前未婚夫車崇健早前參與內地真人騷而成為焦點，李施嬅毫不避諱爆車崇健喺二人過往嘅相處點滴，令唔少網民感到氣憤，於最新一集講李施嬅與車崇健各自邀請一位「撐腰」好友胡蓓蔚上節目。
李施嬅邀請胡說八道好閨密胡蓓蔚，而車崇健就邀請好友兼生意夥伴趙沛源（Danny）。 李施嬅曾透露車崇健喺某年聖誕節講過要送佢一間屋作為禮物，點知呢間屋嘅位置係李施嬅完全唔考慮嘅地區，而持有人個名亦唔係李施嬅，而係車崇健本人。
去到最新一集，車崇健指自己係yes man及sorry man，胡蓓蔚就問佢既然知道問題所在，點解8年嚟一直重複，車崇健就話可能與工作有關，李施嬅隨即問Danny原因，Danny一語道破指佢唔了解個問題係邊。胡蓓蔚認為李施嬅感受唔到真正嘅關心，係想對方了解佢嘅生活。 之後胡蓓蔚再重提買樓嘅問題，唔理解車崇健點解同朋友講，而唔同李施嬅講。
當問到點解明知李施嬅唔鍾意，點解堅持買呢間屋，車崇健坦言覺得係自己經濟負擔到，2020年買房前有帶李施嬅去睇過，但係李施嬅唔鍾意嗰區，女友鍾意住緊嗰區，因此佢喺買之前同買之後都冇同李施嬅講，喺裝修嗰陣，加咗一個「高空瑜珈空間」，佢認為幫李施嬅打造呢個空間，女友就會鍾意。
李施嬅回想當時車崇健話俾佢一個驚喜，車佢去嗰度，見間屋已裝修好，啲裝修係車崇健嘅風格，車崇健嘅思想係偏向住喺自己買嘅屋，而李施嬅比較鍾意租樓，覺得比較自由。車崇健就表示呢間屋週末可以過嚟度假，但每個周末過去令李施嬅感到好大壓力。
胡蓓蔚坦言呢個買樓事件係二人關係上嘅一個危險信號，當時李施嬅好難受，但係李施嬅冇喺好友面前發脾氣，只係消化咗件事先再告訴好友，胡蓓蔚續指李施嬅可以共同負擔貸款，但車崇健當初係想自己承擔，最後認為二人分手原因係缺乏溝通。
