F4合體喺華人娛樂圈掀起一陣回憶殺，嚟緊佢哋將會啟動25周年大型巡迴演唱會，傳踢走朱孝天，由五月天嘅阿信遞補，同言承旭、周渝民、吳建豪組成全新F4，呢邊廂歡天喜地，但被消失嘅朱孝天就笑唔出啦！
新F4同周杰倫推出新歌《恆星不忘Forever Forever》，新歌上線當晚，朱孝天太太韓雯雯就喺直播中為老公抱不平，希望外界唔好再攻擊朱孝天，佢話老公呢段時間為咗有好體態，一個月瘦咗30斤，「他也是滿心期待，從7月到現在，沒有一點鬆懈！然後這段時間就突然一下，莫名其妙地撲天蓋地的一些對他黑他、造謠的事情全都來了，對他惡意的指責，這些話就挺傷害他的」。
韓雯雯話佢哋兩公婆呢幾年過得好好，嚟緊淨係希望安穩過日子，希望網友唔好再有惡意攻擊，佢無奈表示：「《流星花園》不只是你們的青春、我的青春，更是天哥的青春呀！」佢希望大家少啲惡意批評，「不要去傷害一個只是一心期待、要去赴那場約的人」。
至於朱孝天被飛出F4嘅原因，據知係衰多口，因為佢曾經喺直播脫口而出爆料F4將會有新歌，令團隊嚟緊重要計劃提早曝光，為咗避免佢繼續洩密，唯有將佢除名。
