51歲不老男神林志穎（小志）現身北京出席活動，宣布正計劃展開巡迴演唱會，大會播放小志出道以來嘅作品雜錦，睇到紀錄自己成長足跡嘅短片，小志好有感觸。小志回想17歲出道到現在，今年踏入第33年，好珍惜現在每一次演出：「可能因為時間久的關係，不只是我長大了，然後我的粉絲也長大了。」小志仲搞笑話要將自己嘅首本名曲《十七歲的雨季》魔改成《七十歲的雨季》。
小志唱紅無數經典歌，當中有兩首喺音樂平台嘅收藏數超過50萬，司儀叫小志估係邊兩首，第一首當然就係《十七歲的雨季》，不過第二首佢估唔到，原來係電視劇主題曲《我不後悔》。
另外，內地好流行嘅短片經常用小志嘅歌嚟配樂，當中頭兩名受歡迎歌曲，小志就估中係《不是每個戀曲都有美好回憶》同《為甚麼受傷的總是我》，小志即場演繹呢幾首經典歌曲，勾起大家嘅回憶殺。
