12月7號係立法會換屆選舉，朝早10點半，富商 劉鑾雄 同太太 陳凱韻甘比 乘坐7人車，到達大坑徑嘅投票站投票。大劉一落車，身旁嘅保鑣立即遞上以白毛巾覆蓋嘅「大劉私家人肉扶手」，扶住佢行去投票站。精神唔錯嘅大劉，更應傳媒要求停低同甘比一齊合照，期間兩人一直手拖手，非常恩愛。
之後大劉就由太太同保鑣攙扶下步入會場，大約逗留咗七分鐘後，大劉便坐住輪椅離開會場。投票後，甘比揮動手上嘅心意卡，並同大劉一齊喺選舉backdrop前接受傳媒訪問，甘比表示：「我哋心情雖然仍然好沉重，但係今日都需要盡公民責任出嚟投票，希望大家都出嚟投自己心儀嘅人選。」
除咗履行公民責任外，甘比亦表示大劉創辦嘅慈善基金，喺今次大埔火災，除咗有捐錢外，亦有派出義工協助災民，而劉鑾雄與陳凱韻慈善基金，亦好關注災民日後嘅生活同精神健康，希望為佢哋提供更長遠嘅服務同協助。
