鄭子誠分享廿年婚姻保鮮秘訣 被老婆質疑於新劇再演奸角

鄭子誠 同老婆 劉倩怡 都係愛狗之人，呢日兩夫妻應邀出席活動向寵物傳遞溫暖訊息。有音樂情人之稱嘅鄭子誠雖然平日喺電視劇集上演盡奸角，但私下佢其實係一位暖男，夫妻結婚廿多年都依然咁恩愛。呢日佢哋就分享保鮮婚姻嘅秘訣，劉倩怡指自己著重生活細節，間中會買吓小禮物氹老公開心，亦慢慢學習欣賞對方，令彼此關係更持久。

而鄭子誠則認為婚姻除咗包容，亦好需要儀式感，結婚多年佢都會記得老婆生日及結婚周年紀念日等特別日子，會喺呢啲時間做啲嘢令相方更有火花。

鄭子誠近日歸隊喺澳門為新劇《璀璨之城》開工，除咗同 姜大衞John 有好多對手戲之外，亦同眾多演員包括 吳卓羲Ron 、 張智霖Chilam 等合作得好開心，稍後更會跟隨大隊到珠海拍攝。今次鄭子誠會飾演姜大衞表弟，身兼家族管家，不過就令老婆好懷疑係咪奸角？鄭子誠就拒絕劇透，只話自己唔係最奸，叫觀眾到時留意劇集。