一向力求新意的創意班主施姐（彭美施），於2025年推出第12齣嶄新粵劇作品《新龍門客棧》，於7月首度公演兩場均爆滿，原定第三場卻因颱風影響而取消，不少戲迷不斷要求施姐能有機會重演，決定於明年2026年1月強勢回歸重演三場，內部預售已超額訂購，並於本周三公開發售門票。
以電影改編成粵劇嘅《新龍門客棧》，首度公演時，外界好評如潮，就連電影版《新龍門客棧》版權持有人兼導演吳思遠，亦專程到場欣賞，大讚比自己想像更出乎意料咁精彩，吳思遠為推動傳統文化無私支持，只收授權費一元，亦只限於舞台演出，完全為支持粵劇。
今次原班人馬演出，今次2026版本將會再度昇華，配合更逼真刀光劍影聲效，加上4K投影效果與不惜功本增添AI科技元素，觀眾彷如置身在龍門客棧，融入一幕又一幕各路高手人馬、展現各懷鬼胎嘅心理戰之中，由李龍、梁兆明、王志良、梁非同、梁燕飛、梁振文、莫華敏、廖國森、符樹旺、曉瑜等傾力演出。
