2001年因台劇《流星花園》一炮而紅嘅男團F4，於2009年各自發展後，直至今年7月再次合體，現身五月天喺台北同北京嘅演唱會擔任嘉賓。
眾歌迷都渴望見到F4再次踏上舞台開騷，早前亦傳出F4將於本月底於上海開騷，但最終F4變成四缺一，朱孝天換成五月天嘅阿信。坊間傳出有人不滿朱孝天率先喺自己嘅直播中爆出F4開騷出歌。結果喺本月5日，「相信音樂」推出言承旭、周渝民同吳建豪嘅F3新歌《恆星不忘Forever Forever》，當中更有阿信及周杰倫合唱。
朱孝天被飛出F4頓成熱話，佢嘅太太韓雯雯即開直播力撐丈夫，更為老公被抺黑而發聲。至於主角朱孝天就喺9號開直播親自回應事件，佢指網上傳言有啲混亂，因而作出回應。佢表示呢次活動肯定唔會參與，而F4從來不是由合約綁定而成嘅團體，自己會尊重三位團員嘅決定，獻上祝福希望他們演出成功。
佢又透露之前雙方一直係談論意向，從未簽訂正式合約。佢又道出自己早前拒絕對方提出3項要求之後，就被單方面切斷聯繫，而被退出嘅消息，亦是看到外界消息才得知。喺直播尾聲，佢點名指「相信音樂」主管艾姐姐潑髒水：「妳的目的既然已經達成，希望妳好好把這次的演出、演唱會做好。那我就回到自己該做的事，麻煩妳高抬貴手一下吧。」
