龔嘉欣獲閨蜜準備睡衣生日P 鄭嘉穎畀面出席獲餵蛋糕

龔嘉欣喺12月5號嘅36歲正日生日，選擇喺電視城開工同拍攝團隊度過，而一向人緣甚佳嘅Katy，又點會只得一場慶祝活動。閨蜜陳凱琳同譚凱琪就為壽星女舉行一場睡衣主題嘅生日派對，而地點就係Grace嘅豪宅。

呢個睡衣生日P，除咗有Katy嘅閨蜜外，仲有好友嘅另一半同埋佢哋嘅小朋友，實行大人細路一齊玩到盡！身為東道主嘅Grace，更為大家準備咗豐盛嘅美食，雖然美食當前，但Grace嘅囝囝亦大方同爸爸鄭嘉穎分享，親手餵爸爸食蛋糕，相信當時嘉穎應該甜到入心。一向鍾意小朋友嘅Katy，能夠同一班愛錫嘅小朋友一齊慶祝，佢都非常開心，每張相都展露燦爛笑容。