胡鴻鈞 Hubert Wu 日前於佛山演出音樂劇《從來是一對》，為咗呢次演出，Hubert事前落咗唔少苦功去排練，仲爭啲壓力爆煲，幸好演出成功，仲得到觀眾嘅高度評價，令Hubert放下心頭大石。
劇中Hubert飾演喺金融機構工作嘅中佬，因為失業而迷失，其後遇到醉心民族文化嘅女主角，並喺對方帶動下一齊喺佛山南風古灶龍窯做陶藝，重新尋找自己方向。由於陶藝係佛山非物質文化遺產，所以今次能夠喺音樂劇中宣掦承傳意思，令Hubert覺得好有意義。
對於自己嘅處男音樂劇，Hubert笑言要鼓勵一下，唔可以對自己太過嚴苛，所以佢畀自己80分。雖然頭兩場冇咩大失誤，不過Hubert話都有蝦碌事件，佢指有一場戲本來再攞劇中阿媽個袋出嚟，點知出到台時佢突然忘記咗，幸好飾演佢媽媽嘅演員彭杏英係一個好有豐富舞台劇經驗嘅演員，即時幫手執生，先彌補返Hubert嘅失誤。
劇中除咗要現場演繹唔少歌舞外，仲需要Hubert唱粵曲，對此佢直言有一定難度：「其實要唱出粵劇韻味真係好難，始終排練時間咁短，我只係盡量模仿個語氣。」稍後音樂劇將會去到深圳及中山兩站演出，Hubert希望一站比一站演得好，佢仲話經過今次演出後，對演音樂劇相當有興趣，呼籲大家可以邀請佢演出呀。
