人稱「Benz雄」嘅許紹雄喺10月28號病逝，享年76歲。對於遺孀龍嬿而與愛女許惠菁打擊好大，龍嬿而安排好亡夫在港後事，就同女兒一齊返新加坡為亡夫打點當地後事，期間應當地傳媒人紅姑邀請訪談。
紅姑於社交平台分享訪問內容，龍嬿而指丈夫去年9月發現患腎癌後，立即接受割除腫瘤手術，留醫兩、三日便出院。龍嬿而稱丈夫好聽話，跟足醫生吩咐準時食藥、覆診。惠菁更指爸爸到今年中秋節，仍然精神好好一齊過節。直至10點，許紹雄感覺身體唔舒服，檢查後發現癌細胞擴散至肺部，龍嬿而話：「癌症擴散，加上身體受細菌感染，引發多重器官衰竭。」
龍嬿而目前仍未走出喪夫之痛，臉容憔悴，直認每日觸景生情以淚洗臉，丈夫都冇諗過連講一句再見嘅機會都冇就離開，「佢冇留下任何遺言，因為佢根本就冇諗到，自己會走得咁快」，龍嬿而含淚續言：「我整個腦袋都是空的，你知嗎？完全被挖空的感覺，我已經完全懵了。」整件事令全家個心好似被撕裂咁痛，女兒惠菁直認未接受到爸爸離開嘅事實，即使係影相，佢仍會下意識預留一個空位畀爸爸。
許紹雄喺醫院彌留嘅兩日中，幾十位圈中好友收到消息，即趕到醫院見最後一面，龍嬿而話有啲藝人好友仲一直守喺歡喜哥病榻旁邊，直至半夜。足見許紹雄一生被受敬重，以及其人緣之好。家屬亦感激各界出席喪禮送許紹雄最後一程，兼且尊重並保密喪禮細節內容。
對於新加坡藝人錢翰群公開喪禮細節，包括許紹雄繼子悼詞等，龍嬿而與囡囡仍非常氣憤，龍嬿而指堂倌已喺葬禮開始前，講過唔能夠作任何攝錄、唔能夠將葬禮內容透露，龍嬿而覺得對方冇可能唔知道，自己都冇諗過錢翰群居然將追思會上嘅內容對外講，龍嬿而直斥對方冇分寸，令佢同家人好痛心。惠菁再補充話：「佢咁做少咗基本嘅尊重，仲連累我哥哥，佢平時根本唔曝光，而且追思悼文係家屬跟先人之間嘅關係同感情，係一種私人剖白，點能夠拎呢種事公開報道！」