穿越經典，天命回歸！古天樂、林峯、宣萱、郭羡妮及滕麗名主演電影《尋秦記》，將於2025年12月31號登陸大銀幕，原班人馬再度合體，無論係熟悉角色人物，定係家傳戶曉主題曲《天命最高》，必定勾起一眾「尋迷」集體回憶，今日預告及三款全新終極海報正式公布。
項少龍（古天樂 飾）、秦王趙盤（林峯 飾）、琴清（郭羡妮 飾）、烏廷芳（宣萱 飾）、善柔（滕麗名 飾）、滕翼（黃文標 飾）、「陶總管」陶方（歐瑞偉 飾）及李斯（陳國邦 飾）悉數回歸，多年後再度同台，預告以秦滅六國為引子，項少龍隱居田園過平靜生活，與趙盤恩怨未了嘅權力漩渦再次碰撞，為咗守護家園與至親，項少龍被迫重出江湖，重新捲入秦王一統天下嘅動盪風暴。面對重重危機，希望了結與趙盤嘅宿命情仇，佢又能否成功借時光機回到現代，一切懸念將喺大銀幕上揭曉。
原班人馬震撼回歸，電影《尋秦記》亦加入多位全新角色，為故事注入新氣象，預告中率先亮相就係電視版中仲係孩童、如今已成長為英勇少年嘅項少龍兒子項寶兒，亦即係為世人所熟知嘅西楚霸王項羽（朱鑑然 飾）。承接之前公布嘅兩款先導海報，今次公布三款終極海報，分別聚焦項少龍、秦王趙盤嘅核心衝突，以不同視角展現跨越時空嘅命運碰撞。
項少龍與趙盤並列而立，象徵「師徒情仇」與「權勢角力」兩股力量正面衝撞，武器、服飾與光影交織出強烈嘅時空張力，暗示二人再無退路。「項少龍版」海報則以古天樂身穿現代戰術裝備形象為主體，突出其作為時空旅者嘅孤身逆行與背負宿命。「秦王版」海報則以林峯飾演秦王正襟端坐、手握長劍為核心，勾勒出王者凌壓天下嘅氣勢。
《尋秦記》電影版係電視劇版嘅續篇，保留主要人物，同時延續當年經典，故事講一場多年前嘅冤獄，引發改變歷史命運危機，Ken（苗僑偉飾）誓要穿越回秦代稱王，彌補佢因冤獄而失去嘅人生。身在秦朝嘅項少龍（古天樂飾）一家雖歸隱田園，無奈一舉一動仍被徒弟秦王（林峯飾）盡收眼底；正當秦王以為一統六國，稱霸天下之時，竟然碰到現代人Ken突襲，不得不去尋找自己又敬又畏嘅師傅項少龍。師徒久別廿年終於再次碰面，Ken讓三人命運捆綁，秦朝再起風波，恩怨終須了結！
