王鄭浚仁一向寵粉，早前帶住一班海豚粉去佢嘅家鄉馬來西亞檳城遊覽，親自介紹自己嘅成長地方，趁機重溫昔日耍樂時光，Rax肩負「家鄉文化推廣大使」，細訴景點故事同文化背景。
除咗遊覽景點，Rax亦帶大家感受峇迪蠟染嘅過程，讓大家製作獨一無二嘅作品。而海豚粉最期待嘅活動當然係聽偶像一展歌喉，Rax首次喺家鄉獻唱新歌《我就是舞台》，而Rax媽媽同契哥亦有份出席見證。
Rax 話今次行程好開心，可以同一大班海豚粉暢遊自己嘅成長地，每一個景點都滿載佢唔同階段嘅回憶，令佢諗起曾經喺某個特定位置流過嘅汗水同淚水。
