森美月初度過咗52歲生日，近排忙於為全新音樂競技節目《唱錢》拍攝嘅佢，就喺錄影廠收到生日驚喜。一班《森美旅行團》嘅兄弟姊妹麥美恩、丁子朗同吳若希拎埋生日蛋糕突襲出現，令森美非常驚喜。
其實兩年前，麥美恩、丁丁、吳若希原班人馬曾為森美舉行驚喜生日會，點知壽星因工作關係未能出席，不過佢哋覺得「party must go on」，繼續投入慶祝，森美見大家嘅誠意，完成工作後即趕到現場慶祝。
麥美恩一行人決定今年親自送蛋糕，鬼馬嘅麥美恩乘機摸森美胸肌，佢話：「好多人讚叔叔呢期回到春天。等我親手認證吓。其實叔叔只要見到我哋，你睇佢幾咁靚仔，幾咁青春活力，We are family。」
