由奧斯卡導演占士金馬倫執導嘅科幻系列電影第三部，日前喺海南島國際電影節舉行內地首映禮，占士金馬倫率領女主角Zoë Saldaña，以及為中文版配音嘅章子怡、黃軒同孫儷鄧超夫婦齊齊亮相。
子怡喺記招上好識做，一開口就先多謝導演邀請配音，能夠透過聲音為電影進行第二次創作，令佢有特別嘅體驗。孫儷同鄧超兩公婆喺戲中同樣聲演夫妻，雖然二人唔係專業配音員，但兩位表現就得到導演高度讚賞。孫儷配音前已經同鄧超睇完套戲，為咗投入角色，仲喺錄音室一邊配音一邊演戲。
女主角Zoe就話好開心有機會去唔同地方宣傳新戲，仲同大家分享拍攝期間趣事，佢話拍完呢三部系列電影後，自己射箭技術突飛猛進，拍第一部嘅時候，導演曾經同佢打賭100蚊美金，賭佢射唔中目標，估唔到佢一擊即中，賺咗100蚊美金。除咗出席首映禮，占士金馬倫仲參與影展舉行嘅大師班座談會，同大家分享執導呢套史詩級科幻片嘅心路歷程，佢話呢系列電影喺內地得到空前成功，證明電影可以突破語言隔膜，令全世界觀眾產生共鳴，正正係電影最重要嘅元素。
