賈思樂聯同好友陳敏兒一齊作客TVB娛樂新聞台《StarTalk》接受主播潘盈慧訪問，為明年舉行嘅演唱會宣傳之外，仲大談兩人相識50載點滴。敏兒問到Louie仲記唔記得佢哋點樣認識，Louie話真係冇印象，敏兒指當年Louie參加歌唱比賽，自己就係電視機旁嘅一位小粉絲，最後Louie落敗，佢覺得自己比Louie更加唔開心，仲自爆當刻已愛上Louie。
敏兒入行後遇見Louie，話自己長大咗，加上已名花有主，當時跟廖啟智拍拖，不過Louie跟智叔同樣做EYT，經常一班人相約去玩，慢慢變得熟稔。
Louie當年有個花名叫「菜王」，佢解釋因為身邊好多女性朋友，只要佢出聲邀請，就會有號召力，好多女性朋友都會應邀出席，Louie覺得可能一眾女性友認為佢冇殺傷力，佢又獲部份女性友人封為「大眾情人」，佢就好受落呢個稱呼。講到Louie會否成為男士公敵時，敏兒大爆智叔係容易呷乾醋，當年自己都要跟異性保持距離，唯獨係Louie，智叔就十分放心。
敏兒再爆料話自己絕對唔係佢杯茶，Louie鍾意嘅女仔一定要靚，只有少少唔靚都睇唔上眼。Louie認為去到60、70歲仍然單身都係好開心，因為多咗自由度，可以不時改變吓飲食同生活習慣。
Louie覺得最重要係身體健康，保持身邊有好多好好嘅朋友，直至現時都好滿足現況。Louie又講到跟舊愛分開後，仍能保持好好朋友關係，而狄寶娜摩亞就係其中一位，自己去加拿大時，對方又會邀請自己到佢屋企住，而狄寶娜摩亞嘅老公亦係佢嘅好朋友。
談及明年舉行嘅演唱會，Louie話因為上次嘅表演場地唔夠大，好多朋友都嚟唔到欣賞，所以決定再遞紙申請，加上近幾年世界上充滿好多不滿聲音，希望透過自己嘅音樂為世界帶來愛。
