許瑋甯上月底與邱澤舉行婚禮，極速投入工作，呢日佢同導演賴聲川及其他演員現身一個舞台劇排練記招，許瑋甯首次演出舞台劇，雖然呢日帶病上陣，但佢喺排練時依然表現專業。
瑋甯透露前晚突然發高燒，被醫生診斷為A型流感，其後又診斷出腸胃型感冒，瑋甯慘被兩種菌夾擊，由於尚未完全康復，呢日佢戴住口罩見傳媒，話自己好擔心傳染俾身邊人，尤其係佢四個月大嘅囝囝，呢排佢唔敢同阿仔有太多接觸，足足三日唔敢抱囝囝，佢話阿囝呢排成日食手手，所以好擔心阿仔將病菌帶入口。
瑋甯呢排唔單只抵抗力弱咗，就連記性都差咗，睇嚟佢都避唔過「一孕傻三年」嘅魔咒，瑋甯自爆曾試過點完外賣，完全唔記得，仲好堅定咁回應家人冇點過嘢食，直到發現手機嘅訂單，佢先記起此事。
問到佢有冇打算快啲追二胎？瑋甯就話一切順其自然，如果有第二胎都好，想囝囝有個伴，不過而家暫時先專注舞台劇演出，生B嘅事就遲啲再決定。