馬國明一向出名係圈中孝順仔，曾笑言遺傳父親節儉，又係家中唯一男丁，有責任孭起頭家，令父母生活無憂，馬國明父親近日離世，昨晚於世界殯儀館設靈，大殮儀式於今晨進行，靈柩移送到歌連臣角火葬場進行火化。
有報道影到馬國明身穿黑色素服，負責捧父親遺照登上靈車，抵達火葬場時，工作人員移送靈柩進場，太太湯洛雯全程陪伴奶奶，隨親友一齊坐旅遊巴到達，儀式結束後，馬國明神情哀傷拖住湯洛雯步出，二人細心扶住母親上車。
馬國明出身在小康之家，馬父曾任職煤氣公司工程師，馬國明15歲嗰年隨家人移民加拿大，因為爸爸需要兩邊飛，眼見爸爸一個人努力工作，辛苦供養佢哋三姊弟讀書，加上屋企離市區好遠，甚少出去玩，養成節儉嘅習慣，馬國明受父親影響，於大學主修機械工程畢業，後嚟因母親唔適應加國生活，於1999年舉家回流香港，馬國明加入娛圈發展，一直對父母照顧有加。
