郭碧婷與向佐結婚六年，育有一對仔女，由於郭碧婷與小朋友長居台北，兩公婆分隔兩地，外界少不免對二人婚姻狀況，以及郭碧婷同老爺奶奶向華強夫婦嘅關係有所揣測。呢日郭碧婷久違喺台灣出席公開活動，就大方回應與向佐呢對異地夫妻嘅相處模式。
郭碧婷話婚前已講過喜歡喺台北生活，亦澄清夫家從來冇逼過佢生小朋友。講到兩公婆點樣維繫感情，郭碧婷嘅回答似乎有啲弦外之音，「基本上我只在乎小孩有沒有跟他有聯繫」，郭碧婷又指如果打電話畀向佐，只係提佢記得同小朋友聯絡。
據知向太一向好愛錫呢位新抱，不過就有傳性格獨立嘅郭碧婷堅持喺台北嘅生活費，同埋小朋友嘅學費都係自己負擔，不過郭碧婷就否認呢個傳聞，仲話奶奶向太對佢同小朋友都好好：「給我很多錢錢」。
