方力申今年情人節喺冇預警下宣布同圈外女友葉萱（Maple)喺美國結婚，今日佢喺社交平台分享BB出世全紀錄短片。
片中見小方同太太由入院時興奮又緊張嘅心情，到B女出世一刻，仲有小方親手為愛女剪臍帶，以及老婆抱住愛女一齊出院嘅時候，小方全程仔細紀錄。
小方透露BB喺預產期前早幾日率先報到，BB出世之後，小方呢位新手爸爸亦全程照顧B女，與愛女skin to skin攬到實，「Isla 出世嘅時候有少少發燒，蘇醫生叫我哋唔使擔心，並即刻幫Isla處理，當晚佢已經退燒。Isla出世到今日，個樣日日都喺度變，前日似我，琴日似我，然後今日竟然似阿媽，但之後又似返我，真係太神奇」。
小方亦逐一感謝醫護團隊，笑指太太葉萱由結婚後話可以生四個，到懷孕期間太辛苦，太太就話最多生兩個，然後依家Isla 出世後，太太見懷孕至順產整個過程得到咁多support，太太又改口話可以生住三個先，但係小方就笑指自己遲啲會再爭取生第四個，仲希望喺一兩年後能夠展開呢個咁龐大嘅造人大計！
