戴夢夢今日迎嚟41歲生日，喺社交平台分享喜訊，就係女兒Brianna喺兩星期前出咗世！夢夢大曬母女合照，又上載咗一張見夢夢躺喺手術床上，仲話生產過程中腦袋空白一片，當佢抱住剛出世嘅阿女，夢夢與愛女初次見面，感動到喊。
夢夢笑稱踏入不惑之年，唔敢相信自己已成為媽媽，今年只係簡單跟屋企人食餐生日飯，目前佢坐緊月，夢夢形容女兒出世相信係上天畀佢最大嘅生日禮物，夢夢續道：「踏入凌晨12點，她已經跟我慶祝生日了🤭不讓我睡覺、好好和我慶祝一番🤣🤣🤣我們新手爸媽好似迷幻列車咁，同所有父母一樣都經歷緊照顧新生兒的階段🤭。」
夢夢作為新手媽媽努力邊學邊做，坦言照顧初生嬰兒並唔簡單，「但是那種累及攰，心𥚃還是感到無價及甜美🥰」，夢夢今年嘅生日願望係希望阿女身體健康、快樂成長。
夢夢於2021年與圈外男友Kyle結婚，2023年成功懷孕，可惜不幸小產，經歷過無數次努力與失敗，今年8月宣布懷孕，夢夢大方透露求子之路充滿艱辛，以試管嬰兒IVF技術成功懷孕，為咗懷孕打過300針，而且打排卵針嘅時間，整個人特別腫同肥啲，因此夢夢去年一直處於肥腫狀態」，而家終於迎嚟愛女健康出世！
