陳偉霆與內地超模何穗一向將感情事低調處理，10月18號宣佈阿仔出世，陳偉霆近日接受雜誌封面訪問，首公開回應官宣生子原因，罕談深藏多年嘅家庭觀，以及已為人父嘅責任感。
陳偉霆坦言官宣並非突然，佢唔想將阿仔收埋，變成一個被隱藏嘅「秘密」，希望阿仔長大後知道自己出生係被祝福。陳偉霆13歲時父親早逝，自細被家人傾注更多嘅愛與約束，佢喺成長過程每一分每一秒都在想念父親，每次回想小時候跟父母相處點滴，陳偉霆會翻睇十幾張舊照，又指自己鍾意同一啲年長嘅男士交朋友傾偈，其實係下意識尋找學習嘅榜樣。
陳偉霆從十幾歲到而家，每個階段都想得到爸爸嘅認可，即使而家有咗小朋友，陳偉霆思考日後點樣做阿仔嘅好榜樣，佢都有一瞬間「覺得爸爸在就好了」，正因為親身體驗過童年遺憾，令陳偉霆格外珍視自己榮升父親呢個角色，決心想阿仔喺一個透明、充滿祝福嘅親子環境下成長，明白作為父親嘅責任感，亦深刻理解父子關係。
陳偉霆揀喺阿仔滿月公布喜訊，佢解釋咁多年唔公開講感情生活，查實係對伴侶嘅保護，唔想讓感情影響各自工作，但佢哋希望阿仔出世係被祝福，「你的出生是被爸爸媽媽祝福的，也給了我們面對世界的勇氣」，陳偉霆直言小朋友嘅到來，其實係計劃之內。
