女神鄭秀妍自爆懶唔洗頭瞓覺 每次到訪台北必食地道火鍋

代言洗頭水相信係唔少女藝人嘅夢想，韓國女神Jessica鄭秀妍現身台灣出席洗頭水活動，見佢一頭秀髮充滿光澤，私底下應該用咗唔少心機打理，Jessica指自己每日大概用20分鐘護理，但有時工作太攰，就會唔洗頭瞓覺，不過又會發現髮質越變越好。

Jessica擁有高冷嘅女神外表，但其實佢私底下性格可愛，連分享最愛嘅寶島美食，都不經意流露出童真嘅一面。佢話自己最愛食台灣火鍋，而每次企喺醬料枱前都會心情緊張，因為擔心調較唔到好味嘅醬料。

離開少女時代單飛後，Jessica嘅工作重心轉移到內地，所以佢好俾心機學中文，訪問中亦好努力用中文介紹嚟緊嘅巡演計劃，佢承認開騷有一定壓力，同時又好期待同粉絲見面，所以呢份動力會令佢不斷進步。